همسات / بقلم الشاعر محمد الشرقاوي

همسات (7) ______________________ إيه فايدة الأوطان لو حضنها أحزان كلمة وطن ف الأصل إنك تعيش إنسان _______________________ ضحكت عليا وخدت من عمري كل العمر ولقيت حياتي انقضت بين المرار والجمر _______________________ وسط الصبايا بكت بالرقة والاحساس ست البنات واشتكت من غدر أهل وناس _______________________ ما عاد كلام بيفيد ما بين خدم وعبيد الجرح ياما اشتكى بقى كل يوم بيزيد _______________________ هزمت اليأس مية مرة ولسه الجاي مش عارف واشوف دمعة عيون حرة أبات من حسرتي خايف _______________________ السمرا من جرحها تايهة ف كلمة آه تشكي لمين حزنها ودموعها غير لله _______________________ يا نظرة المحتار يا بحر ماله قرار مش لاقي صاحب وفي تحكي له ع الأسرار _______________________ إيه خدنا م الاحساس إلا المرار ف الكاس أما اللي مات قلبهم حصدوا الدهب والماس _______________________ اللي بيشهد زور أخطر من الشيطان والظالم المغرور بيحارب الرحمن _______________________ اليأس خصم عنيد أعنف من الإعصار يصنع خدم وعبيد ويدمر الأحرار _______________________ اطلب حقك واوعى تخاف روحك مش ف ايدين سياف بس الواجب لازم جداً تعمله كامل بالأوصاف _______________________ يا دنيا ليه الأسى والظلم بقى طوفان ضاع الفقير واتنسى وكأنه مش إنسان _______________________ يا زهرة الياسمين مسي لي ع الغاليين مع إن بينا بلاد ساكنين ف نن العين _______________________ يا أمة المليار ما كفاية ذل وعار أنا بس عندي سؤال فين اختفى الأحرار؟ _______________________ شعر / محمد الشرقاوي