أنا معلم متفاني - ‏٠٠بقلم المبدعه / سهير إبراهيم ( أم شريف )

أنا معلم متفاني
من يوم ماتخرجت بعاني
من مرتب كده ع القد
ولا عمره بيقضي حد
إلا يدوبك لقمه وهدمه
ومطالب العيشه ملهاش حد
كل سنه نحلم بزياده
نلاقيها شويه وملهاش عازه
والأسعار علي طول ف العالي
ولا عارفين نشتري م الغالي
قالوا الكادر قلنا ياريت
وياريته ماكان جالنا ياريت
أصل الكادر جه كدرنا
بعتر كرامتنا وأخرنا
وحوافر خمسه وعشرين
هتقضي مين ولا مين
ومكافأه حسدينا عليها
بتستناها ديون تقضيها
بعد شويه قالوا صرحنا
بحوافز عاليه هتفرحنا
دي حوافز متين ف الميه
إستكتروها برضو عليه
وزعوها علي كل الناس
إلا إحنا أقل الناس
مع إننا المفروض ننشال
جوه العين وفوق الراس
إحنا علمنا الأجيال
تبقي قدوه وتبقي مثال
بعد دا كله عاوزني أنداس
بعد كتابتي علي السبوره وفي الكراس
وتخليني أكره نفسي
وأعيش إنسان بلا إحساس
وأعلم أولادي إزاي
إن كرامتك هي أساس
طب يبقالي كرامه منين
وأنا مهمل من كل الناس
أنا المعلم ال بعلم
وورثت الأنبيا بإخلاص
إمتي بقي تغيروا نظرتكم
وتحسوا إذا كان في إحساس

‏٠٠بقلمي / سهير إبراهيم ( أم شريف )